साप्ताहिक ब्लोअप : अञ्जना दास

उचाइ अनि सुन्दरताले उनलाई मोडलिङको रंगीन दुनियाँमा लाग्न मद्दत गरेको छ । झट्ट देख्नेहरू उनलाई विदेशी मोडल भनेर पनि झुक्किन्छन् । पोखरा, महतगौडाकी २१ वर्षीया अन्जना दासको बोली पनि विदेशीको जस्तै छ । मिस पोखरा क्विन–२०१५ की विजेता अन्जना जर्मनीमा बस्दै आएकी छिन् । बिदा पारेर जन्मथलो आएकी अन्जनाले यसपालि सौन्दर्य प्रतियोगितामा सहभागिता जनाएर उपाधि नै जितिन् । फरासिली, अग्ली अनि सुन्दर मुहारकी यी सुन्दरीले प्रतियोगितामा मिस फोटोजेनिकको उपाधि पनि प्राप्त गरिन् । जर्मन बाबु र नेपाली आमाकी सन्तान अन्जना आफूलाई नेपाली भन्नमै गर्व गर्छिन् । युरोप बसे पनि उनी समय–समयमा नेपाल आइरहन्छिन् । जर्मनीमै म्यानेजमेन्टमा ब्याचलर अध्ययनरत अन्जनाको लक्ष्य भने सफल बिजनेस लेडी बन्नु हो ।

अन्जना आफ्नो भाषा बिसर्न हुँदैन भनेर उता पनि सकेसम्म नेपालीमै बोल्ने प्रयास गर्छिन् । गीत गाउन, नृत्य गर्न र घुम्न मन पराउने अन्जना फुर्सदको समय अंग्रेजी तथा नेपाली गीत सुनेर व्यतीत गर्छिन् । नेपाल आएपछि उनले एउटा म्युजिक भिडियोमा अभिनयसमेत गरिन् । ‘अब दुई सातापछि फर्कंदैछु,’ अन्जनाले भनिन्, ‘उता गएर अध्ययनसँगै मोडलिङको अवसरलाई पनि सदुपयोग गर्नेछु ।’ सफलता प्राप्त गर्न मेहनत र धैर्यता चाहिने कुरा बताउने अन्जनाले भविष्यमा मोडलिङमा पनि आफूलाई सबल बनाउने बताइन् ।